រោងសិប្បកម្មកែច្នៃឈើគ្មានច្បាប់មួយកន្លែងសមត្ថកិច្ចចម្រុះរឹបអូសឈើច្រើនប្រភេទបានជាង៤ម៉ែត្រត្រីគុណរួមទាំងឧបករណ៍កែច្នៃ

មន្ត្រីសមត្ថកិច្ចនៅក្នុងការបង្ក្រាបរោងសិប្បកម្មនោះ បាននិយាយថា រោងសិប្បកម្មកែច្នៃឈើមួយកន្លែងនេះ គ្មានច្បាប់អនុញ្ញាតពីរដ្ឋបាលព្រៃឈើនោះទេ និងក្រោយពីបានដឹងរឿងនេះ កម្លាំងសមត្ថកិច្ចចម្រុះខេត្ត បានចុះអនុវត្តវិធានការច្បាប់ ដោយធ្វើការចាប់ បង្ក្រាប និងរឹបអូសបាន ម៉ាស៊ីនអារ ១គ្រឿង ម៉ាស៊ីនជ្រៀកឈើ ១គ្រឿង ផ្លែរណា ៣ ធុងសាំង ៤ ម៉ាស៊ីនម៉ៃតាប់ ១គ្រឿង ម៉ាស៊ីនភ្លើង ១គ្រឿង ម៉ាស៊ីនផ្សារខ្យល់ ១គ្រឿង ម៉ូទ័រឆាត ១គ្រឿង និងឈើ ៦ប្រភេទ គឺឈើគគី ឈើស្ដៅ ឈើស្រឡៅ ឈើកកោះ ឈើក្រញូងស្វា និងឈើក្រញូង មានចំនួនសរុប ៤ម៉ែត្រគូប ៩០០,៣២ ស្មើនឹងជាង ៤ម៉ែត្រគូបត្រីគុណ។

ក្រោយការបង្ក្រាប វត្ថុតាងឈើប្រណិត រួមទាំងឧបករណ៍កែច្នៃឈើទាំងអស់ ត្រូវបានបញ្ជូនយកមករក្សាទុក នៅទីបញ្ជាការអាវុធហត្ថស្រុកត្រពាំងប្រាសាទ និងនៅថ្ងៃទី២៦មករានេះ កម្លាំងអាវុធហត្ថ បានធ្វើកំណត់ហេតុផ្ទរប្រគល់ទៅប្រគល់ឲ្យ មន្ត្រីសង្កាត់រដ្ឋបាលព្រៃឈើត្រពាំងប្រាសាទ ដើម្បីចាត់ការតាមនីតិវិធីច្បាប់ ស្តីពីព្រៃឈើ៕