ក្រសួងព័ត៌មាន ប្រកាសផ្អាកការផ្សព្វផ្សាយរបស់ TVFB ក្រោយផ្សាយព័ត៌មានដែលមានចរិតញុះញង់ ប៉ះពាល់សន្តិសុខ និងសុវត្ថិភាពសង្គម

(ភ្នំពេញ)៖ នៅថ្ងៃទី ០៨ ខែមេសា ឆ្នាំ២០២០នេះ ក្រសួងព័ត៌មានបានចេញសេចក្តីប្រកាសផ្អាកដំណើរការផ្សាយរបស់គេហទំព័រឈ្មោះ www.tvfb.com.kh ,គេហទំព័រ www.fbtv.news និង​ មជ្ឈមណ្ឌលផ្សព្វផ្សាយ TVFB ដោយម្ចាស់អាជ្ញាប័ណ្ណ បានផ្សព្វផ្សាយព័ត៌មានដែលមានចរិតញុះញង់ សណ្តាប់ធ្នាប់ និងសុវត្ថិភាពសង្គម។

លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានបញ្ជាក់ក្នុងលិខិតយ៉ាងដូច្នេះថា «លុបប្រកាសរបស់ក្រសួងព័ត៌មាន ដែលអនុញ្ញាតឲ្យលោក សុវណ្ណ សុខា បើកដំណើរការផ្សាយគេហទំព័រឈ្មោះ www.tvfb.com.kh គេហទំព័រ www.fbtv.news និងមជ្ឈមណ្ឌលផ្សព្វផ្សាយ TVFB ដោយម្ចាស់អាជ្ញាប័ណ្ណ បានផ្សព្វផ្សាយព័ត៌មានដែលមានចរិតញុះញង់ បង្កឲ្យប៉ះពាល់ដល់សន្តិសុខ សណ្តាប់ធ្នាប់ និងសុវត្ថិភាពសង្គម»។

គួរបញ្ជាក់ផងដែរថា ​កាលពី​យប់​ថ្ងៃទី​៧​ខែមេសា​ឆ្នាំ​២០២០ ម្សិលមិញនេះ ប៉ូលិស​បាន​ចាប់ខ្លួន​លោក សុវណ្ណ​រិទ្ធី ចាងហ្វាង​ផ្សាយ​របស់ TVFB ដែល​កំពុង​ល្បី​ក្នុងប្រទេស​កម្ពុជា នៅក្នុង​បុរី​ពិភពថ្មី ខណ្ឌ​សែន​សុខ ក្រោយពី​លោក សុវណ្ណ​រិទ្ធី បង្ហោះផ្សាយព័ត៌មានពាក់ព័ន្ធនឹងអនុសាសន៍របស់សម្ដេចតេជោ ហ៊ុន សែន ដែលបានលើកឡើងក្នុងសន្និសីទ កាលពីព្រឹកម្សិលមិញ ករណីជំងឺកូវីដ១៩ នឹងអ្នករត់ម៉ូតូឌុប។

លោក​ឧ​ត្ត​ម​សេនីយ៍​ឯក ស ថេត អគ្គ​ស្នងការរង​នគរបាលជាតិ និង​ជា​ស្នង​នគរបាល​រាជធានី​ភ្នំពេញ បាន​ថ្លែងប្រាប់សារព័ត៌មាន​​ថា “​ពិតជា​មានការ​ចាប់ខ្លួន​លោក សុវណ្ណ​រិទ្ធី ពិតប្រាកដ​មែន​។ ការចាប់ខ្លួន​នេះ ពាក់ព័ន្ធ​នឹង​បទល្មើស​ញុះញង់​ឲ្យ​ប្រព្រឹត្ត​បទល្មើស​ជាអាទិ៍ តាម​មាត្រ ៤៩៥”​៕